ادريس عبدالوهاب .. درت الحلة يكتب، من ذاكرة الحرب وحمار الجعلي

 

كارو الجعلي..وحمار الجعلي..وابتسامة الجعلي... 

في فترة الحرب اللعينه كانت اهم مقومات الحياة في بيتك..

بطارية شحن بالطاقه

وشريط بندول

وغنمايه بتحلب لبن

وكارو حمار...

وكيله عيش دقيس لانو القمح كان من عجايب الدنيا السبعه الكيله بي 50 الف..

المهم في القصة دي كانت أجمل حاجه من الصباح لمن نسمع حمار الجعلي يهنق... وهو جاي على الحله بي الكارو لانو حلة الطاهر منطقه دعامه وصعب الوصول ليها لانو الدعامه حفظو الناس الفيها تاني اي زول يجي بفتكرو استخبارات... ما كان فيها زول غير الجعلي ومحمد فتح والصادق بشارة والفاضل وعلى الأمين وبكري وعمنا حاج وسي..

 المهم الحمار ده لمن يهنق انت بخشك فرح لانو لو في زول عيان بشيلو ولو في زول داير يرحل حاجه ولو في حوجه لي علاج من الزلط المحاصر بجيبها.. المهم هو تاكسي الغرام الوحيد البطمنا انو الحياة بخير.. كل الحله متابعه صحه حمار الجعلي ولساتك الكارو وصحت الجعلي ذاتو لانو ساعي البريد الوحيد عن تحركات الدعامه والليله جو كتار ولا شويه.. وهو الوحيد البودي النسوان والرجال الاستار لينك...ولمن اجي داخل من الاستار لينك ويهنق دي كمان فرحه تانيه لانو الناس شايله اخبار الاهل البره ونقعد نسأل المات منو والعرس منو والرسلو لي مصاريف منو ( تحية حب وتقدير للمغتربين بنضحك لمن حمار الجعلي اجي من الاستار لينك لانو شايل اشعاراتكم الخضراء وكنتو السند لي كل الأسر ربي يعظم أجركم) المهم في القصة دي انو حمار الجعلي كلنا بنغني لي

( ان شاء الله ما تصيبك عيون)

شاءة أقدار الله أنو حمار الجعلي يضعف من عدم العيش الفيتريت وكلنا بنسعي مع الجعلي لازم يدبر عيش لي الحمار.. وامكن يكون عيان.. وامكن يكون ماكلو دبيب وامكن وامكن... دي اخبار الصباح يوميا عن صحة حمار الجعلي..وعندنا الاستشاري طب بيطري صالح الحلبي.. بعد مشاورات قرر أدى نوعين من الحقن جامع الأمراض... وتبقى الاسئله من جديد ان شاء الله الحقن نفعنو.. المهم بعد يومين حمار الجعلي عاد لي الهنيق من جديد وكانت فرحه عجيبه... انو سمعنا الهنيق الساعه 2 صباحا ماهو ذاتو مافي نوم وكان في خليع... بعد القصه دي كلها حصلت حاجه عجيبه في إصبع اليد اليمين لي الجعلي.. قالو دي نشره وناس قالو حساسية... المهم الدكتور الصنديد وده ما محل شكرو كان شايلنا بي كل صبر وحنيه واليد الفيها البركه يخش من بيت ويطلع من بيت ونص الليل يزعف في أماتنا الكبار وابواتنا وعارفنك ما مشحود علينا لكن يجازيك رب العباد... الأخ العزيز دكتور علي موسي الأطرش.. والله حقو الطب يتشرف بيك يا جميل المنظر والأخلاق... لانو نحن في الحلتين واسرة الجعلي منتكلين على الجعلي و حمار الجعلي من بعد الله تعالي.. المهم قررو يدو السامكسون والنظافه اليومين وكده بقينا متابعين الجعلي وحمار الجعلي وتطول الحكاية مع المرض وعدم العنايه ورادة ربنا واقدارو... بعد تعب شوية قررنا انو يمشي الجمالاب للطبيب المختص ورقد هناك 18 يوم غياب من صاحب الابتسامه والتسامح وخدمه الناس في غيابهم... اي بيت نقول لي اهلو مافي والناس خايفه من الدعامه يشيلو العفش...

يقول ليك ما مشكلة ارحكم نجيبو على بيت فلان ونشيل ده على ناس فلان ومن دون قرش ولو اديتو يقول ليك الساهله رغم الحوجه ورغم الحال الحرن..

هو محتاج واسرتو محتاجه وحمارو محتاج.. وكل ده يصارع فيهو بالابتسامة الجميله وحتى هنيق حمارو بنبتسم معاهو..

المهم مره عندو غنمايه بشرب بيها الشاي جو الدعامه قالوا لي دايرين نفتش بيتك انت استخبارات قفلوا في الاوضه وشالوا العنز وفاتو...

ونحن منتظرين الجعلي جانا يضحك قال قفلوني وشالو عنزي تاني شاي احمر بس..

استمر في التهاب الإصبع وحصل تاني التهاب في الارجل زي البعملو الحشر في الخريف.. امتدت المعاناه مع المرض ومع الحمار المرضان واسرتو الطول منها...

قررنا انو يمشي الدويم يتعالج ويجي.. وافق على المشي لانو قال افوتكم كيف وانتو في الحصار ده..لكن في ناس فاتو ساهي ولا كلمونا.. لكن عفو الله والرسول... ما العفو لله بقالي جدار... المهم الجعلي فات الدويم وجراني على جمب.. قال لي القروش الململها عندك اديني منها النسافر وخلي عندك باقي عشان تجيب عيش لي الحمار وده البرمندي والحبل والكارو لمها لي عندك..

وده كان اكتر يوم حزن.. فقدنا الجعلي وحمارو...

وبقينا نسأل من الجعلي ومن اخبارو...

 ونودي لي اخبار حمارو انو كويس لكن الحاجه الغريبه لمن فات الجعلي تاني ابي يهنق..

كل مره نستعين بي صديق..

ودعوات أماتنا الله يرفعك يا الجعلي ويرفع حمارك...

ومره مره تجينا الاخبار انو بقى كويس لكن الحمار ما كان كويس..

أخيرا قالو الالتهاب وصل الأعصاب ورقدو عنايه مكثفه..

ونحن نشيل ونودي الجعلي بقى كيف ننتظر يوم السوق...

الناس تمشي من صباح الرحمن وتنتظر الدعامه يصحو عشان يشغلو فراح القلوب الحله كلها منتظره الاخبار... اصحى واحد دعامي هلفوت يقوم ذي الجعران يقول ليكم مافي ارجعو أهلكم.. ونبقى نحلل في الاخبار البايته حقت السوق الفات...انو الجعلي بكون قام عديل...لمن قنعنا من السوق والأخبار.. جانا خبر كويس.

بكرى جاب لينا عيش لي حمار الجعلي...وجبنا لي قصب من إدريس ود مالك..

ده عشان اطلع الجعلي من العنايه واطلع حمارو من المرض اللعين..

واتشاورنا نعلق لي بي ملوه ولا نص ملوه.. اتفقنا على نص ملوه وكليقه قصب...

واجمل خبر حمار الجعلي عاد للهنيق.. (كبرت كراعي من الفرح) ذي ما قال كابلي..

المهم السوق الجاي ونحن في انتظار اخبار الجعلي الناس جات حزنانه حزن غريب انو الجعلي مات وبكينا قدر ما الله ادانا...

وكلما اعاين لي الحمار الاقي تعب اكتر بعد كم يوم جيت كلمت امي الله يديها العافيه وكان الجعلي متعبها تعب شديد قلت ليها حمار الجعلي مات... وتاني بدت تبكي وانا ذاتي زرمدت.. من شدة الوجع... حتى الحمار فات في حق الله.. لحق الجعلي.. وبديت استرجع في ذكريات الجعلي وابتسماتو العزيزه.. كان يعاين فيك ويضحك ما عارف لي شنو.. الغريبه انو انت بتضحك معاهو......

 الغريبه الناس في الجامع كلها بكت على الجعلي وكل زول شال الفاتحه لي الزول الجمبو لاننا روح واحد في كم نفر.....

الحاجه الغريبه والعجيبه....

لمن اجبرونا الدعامه في الأيام الأخيرة وحاصرنا الطيران الجميييل ساحق الدعامه.. كانت الناس الفضلت كلها في بيتين...

قررنا نطلع القراصه...

وكان اخونا مصعب مضروب في كراعو والنزيف مالي المكان.. ما لقينا حاجه اسعفت مصعب وشالت امي وخالتي نفيسه الا كارو الجعلي...

بس بقيت انا الحمار...

جاري الكارو

وخالتنا نور الشام الله يرحمها شايلنها في الدرداقه...

 وده كان آخر عهد بي كارو الجعلي..

وفضل عندي الحبل والبرمندي والكارو...

رحمة الله تغشاك يا الجعلي

ويجعل البركه في زيتك...

لعن الله الحرب والدعامه...

الغريبه وانا بتذكر في الأحداث بضحك ما عارف من شنو.. تحياتي درت الحله

3يوليو 2026